Azərbaycan bu il turoperatorların ruslara tətil üçün təklif etdiyi ölkələr siyahısına daxil edilib.
Məsələn, Fun&Sun turoperatoru Rusiyadan Birləşmiş Ərəb Əmirlikləri (BƏƏ), Türkiyə, Tailand, Qətər, Misir, Maldiv adaları, Seyşel adaları, Şri-Lanka, İndoneziya (Bali), Serbiya, Ermənistan və Azərbaycana birbaşa uçuşlar və ya reyslərlə turlar təklif edir.
AZƏRTAC xəbər verir ki, Rusiya Turoperatorları Assosiasiyasının saytında “Azərbaycan: tanınmış və dadlı səyahət” məqaləsi dərc olunub.
Məqalədə deyilir: “Azərbaycana səyahət qonaqları əla qastronomik macəra ilə birləşdirilə bilən ən zəngin tarixi irslə tanışlıqla valeh edəcək. Turistlər görməli yerləri gəzə və ziyarət etmək üçün maraqlı restoranlar və yeməklər seçə bilərlər. Azərbaycan yaxındır. Moskvadan uçuş təxminən 3 saat çəkəcək".
6 gün / 5 gecəlik “Azərbaycan qastronomik turu”n qiyməti belədir: 65 875 rubldan (775 dollar) üstəgəl aviabilet.
Ruslara Azərbaycan milli mətbəxinin ləziz təamları, “Həftə sonu Bakıya qaçaq”, “Azərbaycan: UNESCO memarlıq abidələri”, “Xəzərdən Qafqaz dağlarına” ekskursiyaları təklif olunur.
