Türkiyənin Səhiyyə naziri Fahrettin Koca yerli mediaya təyyarələrdə maska taxılması ilə bağlı vəziyyəti şərh edib. Onun sözlərinə görə, hava səyahətləri zamanı maska taxmaq məcburiyyəti yoxdur. İndi bu tədbir xüsusilə 65 yaşdan yuxarı, xroniki və digər xəstəlikləri olanlar üçün tövsiyə xarakterlidir.
“Belə sərnişinlər risk gördükləri yerdə özlərini maska ilə qorumalıdırlar. Digər tərəfdən, yuxarı tənəffüs yolu infeksiyasının hər hansı bir əlaməti olan insanlar başqalarını potensial infeksiyadan qorumaq üçün mütləq maska taxmalıdırlar”, - deyə Koca bildirib.
Beləliklə, türk hava yolları məcburi maska rejimini ləğv etmək hüququ əldə edib. Daha əvvəl Türk Hava Yollarının rəhbəri Bilal Ekşi bunun "sərnişinlərin yorğun olduğu üçün" zəruri olduğunu bildirmişdi.
Xatırladaq ki, Türkiyədə aprelin 27-dən tibb müəssisələri və ictimai nəqliyyat istisna olmaqla, qapalı məkanlarda maska taxmaq tələbi ləğv edilib.
