23 Mart 2022, 12:24

Qəzadan sonra "China Eastern" Boeing 737-800 təyyarələrinin uçuşlarını dayandırdı

Boeing-in səhmləri 7% ucuzlaşıb
Qəzadan sonra

Çin Mərkəzi Televiziyasının (CCTV) verdiyi məlumata görə, China Eastern Airlines aviaşirkəti məlum təyyarə qəzasından sonra donanmasında olan bütün Boeing 737-800-lərin uçuşlarını dayandırıb.

Dünyada təyyarə parkının ümumi dəyərinin bir trilyon ABŞ dollarına çatdığı yeganə ölkə adına sahib olan Çinin əsas mülki aviasiya şirkətlərinin istismarında təxminən 1400 ədəd yeni nəsil “Boeing 737-800” tipli təyyarə var ki, bu da həmin şirkətlərin təyyarə parkının 37 faizi deməkdir.

“Mənbələr bildiriblər ki, hava daşıyıcısı hadisənin səbəbləri araşdırılarkən və aydınlaşdırılarkən qalan Boeing 737-800-lərin istismarını dərhal dayandırmaq qərarına gəlib”, - portal qeyd edir.

Xatırladaq ki, təbii fəlakətdən sonra Çin prezidenti Si Tsinpin fövqəladə mexanizmin işə salınması: qurbanların axtarışı və xilas edilməsini təşkil etmək, həmçinin qəzanın nəticələrini aradan qaldırmaq əmri verib.

“Çin Şərq Hava Yolları” (“China Eastern Airlines”) şirkətinin martın 21-də qəzaya uğramış “Boeing 737-800” təyyarəsinin qara qutularından biri tapılıb.

Bu barədə axtarış işləri aparan heyət üzvləri mətbuat konfransında bildiriblər. Qeyd edilib ki, təyyarənin düşdüyü ərazinin dağlıq və sıx meşəlik olduğundan axtarış işləri çox çətinliklə aparılıb. Ümumiyyətlə, 680 min kvadratmetr sahəni əhatə edən axtarış işlərinə 2 min nəfər şəxsi heyət, 100-dən çox texnika, polis və hərbçilər cəlb olunub. Bundan başqa, axtarış işlərində dronlardan da geniş istifadə edilir. Hələlik sərnişin və heyət üzvlərindən heç kim tapılmayıb.

Qeyd edək ki, göyərtəsində 123 sərnişin və 9 heyət üzvü olan təyyarə Çinin Kunmin şəhərindən Quancou şəhəri istiqamətində uçarkən Quansi Cuan muxtar bölgəsində qəzaya uğrayıb. Çin Mülki Aviasiya İdarəsinin məlumatına əsasən, MU5735 uçuşunu yerinə yetirən təyyarə yerli vaxtla 13:11-də havaya qalxdıqdan təxminən 1 saat 10 dəqiqə sonra radarlardan itib. Altı ildən çoxdur istifadədə olan təyyarə Tensiən rayonunda dağa çırpılıb və alışıb. Çinin 4 ən iri aviasiya şirkətindən biri olan “Şərq Hava Yolları” qəzadan sonra istifadəsində olan bütün “Boeing 737-800” tipli təyyarələrin uçuşunu dayandırıb.

“China Eastern Airlines” şirkəti qəza ilə əlaqədar 9 işçi qrupu yaradıb. Bu qruplar hadisənin təhqiqatı, təyyarədə olan sərnişinlərin ailələrinə dəstək, logistika, hüquqi işlər, maliyyə və digər məsələlərlə məşğul olur.

“Boeing” şirkəti qəzanın araşdırılması üçün “Çin Şərq Hava Yolları” şirkəti ilə əməkdaşlıq etdiyini və lazımi dəstək verəcəyini açıqlayıb. Qəzadan sonra “Boeing” şirkətinin aksiyaları birjalarda 5,5 faiz ucuzlaşıb. Bu, “Boeing 737-800” tipli təyyarələrlə bağlı 22-ci, insan tələfatı ilə nəticələnən 10-cu hadisədir. Bu qəza həm də Çin mülki aviasiyasının 4227 günlük və ya 11 il yarımlıq təhlükəsiz uçuş seriyasına son qoyub. Çin mülki aviasiyasında bundan əvvəlki sonuncu qəza 2010-cu ilin avqustunda baş verib. “Henan Hava Yolları” şirkətinə məxsus “Embraer E-100” tipli təyyarənin Heyloncian vilayətində qəzaya uğraması nəticəsində 44 nəfər ölmüş, 52 nəfər xəsarət almışdı. Çin mülki aviasiyasında qəzasız uçuş dövründə rekord sayda - 5 milyard 110 milyondan çox sərnişin daşınıb.

ABŞ-ın Federal Aviasiya Administrasiyası qəzanın təhqiqatına dəstək göstərməyə hazır olduğunu bəyan edib. ABŞ Nəqliyyatda Təhlükəsizlik Milli Bürosu isə hadisənin araşdırılması üçün məsul şəxs təyin edib. Qəzaya uğrayan təyyarədə əcnəbi sərnişinlərin olmadığı bildirilir.

Çin təyyarəsinin qəzaya uğraması xəbərindən sonra Boeing-in səhmləri Nyu-York Fond Birjasında ilkin ticarətdə 7% ucuzlaşıb.